សេដ្ឋកិច្ចកម្ពុជានឹងកើនឡើងក្នុងអត្រា ៥,១ ភាគរយនៅឆ្នាំនេះ និង ៦,២ ភាគរយនៅឆ្នាំ ២០២៣ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
ការព្យាករណ៍នេះបានអនុវត្តតាមការវាយតម្លៃបឋមនៃស្ថានភាពម៉ាក្រូសេដ្ឋកិច្ចរបស់កម្ពុជាដោយបេសកកម្មរបស់មូលនិធិរូបិយវត្ថុអន្តរជាតិ (IMF)។
ទាក់ទងនឹងការវាយតម្លៃស្ថានភាពសេដ្ឋកិច្ច និងហិរញ្ញវត្ថុក្នុងប្រទេសនេះ លោក Alasdair Scott ប្រធានបេសកកម្មរបស់ IMF ប្រចាំកម្ពុជា មានប្រសាសន៍ថា កំណើននេះនឹងកើតឡើងដោយសារការងើបឡើងវិញនៃសេដ្ឋកិច្ចសង្គម ទោះបីជាមានហានិភ័យមួយចំនួនដូចជាអតិផរណាខ្ពស់ សង្គ្រាមរុស្ស៊ី-អ៊ុយក្រែនដែលកំពុងបន្ត។
លោកថា ការធ្លាក់ចុះនៃសេដ្ឋកិច្ចចិន និងការរឹតបន្តឹងគោលនយោបាយរូបិយវត្ថុលឿនជាងការរំពឹងទុកក្នុងប្រទេសអភិវឌ្ឍន៍។លោកបន្តថា ជាមួយគ្នានេះ
សេដ្ឋកិច្ចកម្ពុជានៅឆ្នាំ២០២៣ ត្រូវបានគេរំពឹងថានឹងកើនឡើងខ្ពស់ជាងការព្យាករណ៍ពីមុនដែលមាន ៦,២ ភាគរយ ដែលភាគច្រើនដោយសារតែកំណើននៃវិស័យទេសចរណ៍។
IMF ក៏បានជំរុញឱ្យរដ្ឋាភិបាលកម្ពុជាចាត់វិធានការទាន់ពេលវេលាដើម្បីដោះស្រាយបញ្ហាប្រឈមសង្គម និងសេដ្ឋកិច្ច និងទប់ស្កាត់ការរីករាលដាលនៃជំងឺកូវីដ-១៩។ ជាពិសេស យុទ្ធនាការចាក់វ៉ាក់សាំងដ៏ជោគជ័យរបស់កម្ពុជាគួរតែបន្ត។
ក្រុមការងារនៃបេសកកម្មក៏បានសម្តែងនូវឆន្ទៈដ៏មុតមាំក្នុងការជួយដល់ប្រទេសកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ានឆ្នាំ ២០២២ នាពេលខាងមុខ និងផ្តល់ការគាំទ្របន្ថែមទៀតដល់រដ្ឋាភិបាលកម្ពុជាទាក់ទងនឹងជំនួយបច្ចេកទេស និងគោលការណ៍ណែនាំ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងពីសារៈសំខាន់នៃបេសកកម្មបច្ចុប្បន្នរបស់ IMF ក្នុងបរិបទនៃភាពមិនច្បាស់លាស់ និងភាពតានតឹងផ្នែកភូមិសាស្ត្រនយោបាយដែលកើនឡើង ដូចជាសង្រ្គាមរុស្ស៊ី-អ៊ុយក្រែន ដែលបានប៉ះពាល់ដោយផ្ទាល់ និងដោយប្រយោលដល់ប្រទេសជុំវិញពិភពលោក។
លោករដ្ឋមន្ត្រីក៏បានស្នើឱ្យ IMF ពិនិត្យមើលលើបញ្ហាសំខាន់ៗចំនួនបីក្នុងប៉ុន្មានខែខាងមុខ រួមទាំងការកើនឡើងអតិផរណាដោយសារសង្គ្រាមរុស្ស៊ី-អ៊ុយក្រែន និងផលប៉ះពាល់របស់វាមកលើសេដ្ឋកិច្ចកម្ពុជា ជាពិសេសក្នុងវិស័យកសិកម្ម។
ជាងនេះទៅទៀត មានបញ្ហាជាមួយនឹងការកើនឡើងយ៉ាងឆាប់រហ័សនៃឥណទានឯកជន និងហានិភ័យសេដ្ឋកិច្ចដែលប្រឈមមុខដោយវិស័យសំណង់ និងអចលនទ្រព្យ។ បេសកកម្មនេះក៏ត្រូវបានជំរុញឱ្យពិនិត្យឡើងវិញនូវយុទ្ធសាស្ត្រប្រមូលចំណូលរបស់រដ្ឋាភិបាល និងប្រភពថវិកា៕
សម្រាប់អត្ថបទដើម សូមចូលទៅកាន់តំណភ្ជាប់នេះ
ដោយ៖ សុក សិទ្ធិកា
ប្រែសម្រួលដោយ៖ សុ ជាតា
ព័ត៌មាន៖ ខែ្មរថាមស៍
កាលបរិច្ឆេទបោះពុម្ភផ្សាយ៖ ថ្ងៃទី១៩ ខែឧសភា ឆ្នាំ២០២២
