វេទិកាពិភាក្សា និងផ្គូផ្គងអាជីវកម្មតាមប្រព័ន្ធអនឡាញស្ដីអំពី “ផលិតផល កសិកម្ម និងចំណីអាហារ៖ ឱកាសពាណិជ្ជកម្មរវាងកម្ពុជា និងវៀតណាម”

នាព្រឹកថ្ងៃទី១៦ ខែសីហា ឆ្នាំ២០២៤ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ សហការជាមួយទីភ្នាក់ងារអភិវឌ្ឍន៍សហគ្រាសនៃប្រទេសវៀតណាម ដៃគូអភិវឌ្ឍន៍ និងទីភ្នាក់ងារGIZ បានរៀបចំវេទិកាពិភាក្សា និងផ្គូផ្គងអាជីវកម្មតាមប្រព័ន្ធអនឡាញស្ដីអំពី “ផលិតផល កសិកម្ម និងចំណីអាហារ៖ ឱកាសពាណិជ្ជកម្មរវាងកម្ពុជា និងវៀតណាម” ដែលរៀបចំឡើងនៅលើ ថ្នាល ASEAN Access MATCH ដោយមានការចូលរួមពីលោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យម លោក Nguyen Duc Trung អគ្គនាយករងនៃទីភ្នាក់ងារអភិវឌ្ឍន៍សហគ្រាសនៃប្រទេសវៀតណាម លោក លោកស្រីមកពីស្ថាប័នពាក់ព័ន្ធ និងម្ចាស់អាជីវកម្មមកពីប្រទេសកម្ពុជា និងប្រទេសវៀតណាម សរុប៩០នាក់។

វេទិកានេះ រៀបចំឡើងក្នុងគោលបំណងផ្ដល់ព័ត៌មាន បច្ចេកទេស ឱ្យយល់ដឹងស៊ីជម្រៅអំពីនិន្នាការថ្មីៗអំពីផលិតផលនាំចេញ នាំចូលរវាងប្រទេសទាំងពីរ និងឱកាសសម្រាប់ម្ចាស់អាជីវកម្មក្នុងការស្វែងរកដៃគូ និងពង្រីកបណ្ដាញក្នុងប្រទេសទាំងពីរ។ ក្រៅពីនេះ ម្ចាស់អាជីវកម្មក៏ទទួលបានព័ត៌មាន និងណែនាំពីអ្នកជំនាញអំពីរបៀបនៃការដោះដូរពាណិជ្ជកម្មរវាងប្រទេសទាំងពីរ។

ក្នុងនោះដែរ លោក ឈា ឡាយហ៊ី ក៏បានសង្កត់ថ្ងន់អំពីការដោះដូរពាណិជ្ជកម្មរវាងប្រទេសទាំងពីរ ជាពិសេស លោក ក៏បានលើកទឹកចិត្តឱ្យម្ចាស់អាជីវកម្មនៃប្រទេសទាំងពីរចូលរួមប្រើប្រាស់ថ្នាលផ្គូផ្គងអាជីវកម្មតាមប្រព័ន្ធអនឡាញ ASEAN Access MATCH ឱ្យបានផុសផុលដើម្បីទទួលបានឱកាសក្នុងការផ្គូផ្គងអាជីវកម្ម ពង្រីកបណ្ដាញដៃគូ និងចូលទៅកាន់ទីផ្សារថ្មី ស្របទៅតាមយុគ្គសម័យឌីជីថល។

គួររំលឹកផងដែរថា វេទិកានេះរៀបចំឡើងក្រោមការគាំទ្រពីគម្រោងសហប្រតិបត្តិការអាស៊ាន-អាល្លឺម៉ង់ “ពង្រឹងរចនាសម្ព័ន្ធសម្រាប់ការលើកកម្ពស់សហគ្រាសធុនតូច និងមធ្យមក្នុងតំបន់អាស៊ាន (ASEAN-SME)” ដែលអនុវត្តដោយទីភ្នាក់ងារ GIZ ប្រចាំប្រទេសកម្ពុជា។

ដោយ៖ គេហទំព័រKhmerSME

នវានុវត្តន៍

ការគាំទ្រដល់នវានុវត្តន៏ចំពោះសហគ្រាសខ្នាតតូច និងមធ្យមអាចជួយជំរុញកំណើនសេដ្ឋកិច្ចជាតិ ដោយបង្កើនផលិតភាព និងកាត់បន្ថយគម្លាតប្រាក់ឈ្នួលរវាងសហគ្រាសធុនតូច និងមធ្យមនិងក្រុមហ៊ុនធំៗ។ ..