ភ្នំពេញៈ ថ្នាក់ដឹកនាំសមាគមស្វាយចន្ទីកម្ពុជា បានឱ្យដឹងថា មានក្រុមហ៊ុនចិន ៦ បានមកពិភាក្សាជាមួយខ្លួនពីការបើករោងចក្រកែច្នៃគ្រាប់ស្វាយចន្ទីនៅកម្ពុជា ខណៈក្រុមហ៊ុន ១ ក្នុងចំណោមនោះ គឺជាក្រុមហ៊ុនកៀបយកប្រេងពីសម្បកស្វាយចន្ទី។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ឱ្យដឹងនៅថ្ងៃទី ១ ខែមករា ឆ្នាំ ២០២៤ ថា នៅក្នុងពិធីបញ្ចុះបឋមសិលាសាងសង់រោងចក្រកែច្នៃគ្រាប់ស្វាយចន្ទីរបស់វិនិយោគិនសិង្ហបុរី កាលពេលកន្លងមក លោកបានអញ្ជើញវិនិយោគិនចិនមកចូលរួមក្នុងកម្មវិធីនេះ ហើយវិនិយោគិនទាំងនោះបានបង្ហាញបំណងក្នុងការបើករោងចក្រកែច្នៃគ្រាប់ស្វាយចន្ទីជាពិសេសរោងចក្រកៀបយកប្រេងពីសម្បកស្វាយចន្ទី។
លោកបន្ថែមថា ថ្នាក់ដឹកនាំក្រុមហ៊ុនចិនបានចាប់អារម្មណ៍ខ្លាំងចំពោះបរិមាណស្វាយចន្ទីដែលកម្ពុជាមានច្រើន ដោយសារតែក្រុមហ៊ុនមានតម្រូវការសម្បកស្វាយចន្ទីសម្រាប់កៀបយកប្រេងដើម្បីនាំទៅលក់នៅបណ្តាប្រទេសដែលគិតគូរដល់បរិស្ថាន ដូចជាតំបន់អឺរ៉ុប ជប៉ុន និងកូរ៉េខាងត្បូង ជាដើម។
លោក ស៊ីឡុត បានបញ្ជាក់ថា៖«វាជាសញ្ញាវិជ្ជមានសម្រាប់កម្ពុជា ដោយខ្ញុំសង្ឃឹមថា ខាងក្រុមហ៊ុនគាត់នឹងបន្តទាក់ទងជាមួយយើងបន្តទៀត ព្រោះបើគាត់ចង់បើករោងចក្រ គឺយើងមានដីសម្រាប់ឱ្យពួកគាត់គ្រប់គ្រាន់ក្នុងការវិនិយោគ»។
លោកបញ្ជាក់ថា៖«សមាគមស្វាយចន្ទីសូមស្វាគមន៍ ដោយយើងក៏មានការលើកទឹកចិត្តពីរាជរដ្ឋាភិបាល និង CDC ក៏ដូចជាអាជ្ញាធរខេត្ត ដែលតែងយកចិត្តទុកដាក់ក្នុងការវិនិយោគផ្នែកកសិ-ឧស្សាហកម្ម។ ខ្ញុំជឿថា ក្រុមហ៊ុនទាំងអស់នោះនឹងសម្រេចចិត្តជាវិជ្ជមាននៅក្នុងឆ្នាំ ២០២៤-២០២៥ នេះ»។
ដើម្បីអានអត្តបទពេញ សូមចុចទីនេះ
ដោយ ៖ វណ្ណ សុជាតា
កាលបរិច្ឆេទបោះពុម្ភផ្សាយ ៖ ថ្ងៃទី ០២ ខែមករា ឆ្នាំ២០២៤
ព័ត៌មាន ៖ ភ្នំពេញ ប៉ុស្តិ៍
