ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃសុក្រ បានជួបជាមួយតំណាងក្រុមហ៊ុន Hainan Litree Purifying Technology Co., Ltd. ដើម្បីពិភាក្សាអំពីចំណាប់អារម្មណ៍របស់ក្រុមហ៊ុនក្នុងការពង្រីកការវិនិយោគរបស់ខ្លួនក្នុងវិស័យទឹកស្អាតនៅកម្ពុជា។

លោក Cai Yunlong នាយកប្រតិបត្តិនៃក្រុមហ៊ុន Hainan Litree Purifying Technology បានរាយការណ៍ថាក្រុមហ៊ុនដែលបានបង្កើតឡើងក្នុងឆ្នាំ១៩៩២ មានភាពល្បីល្បាញដោយសារជំនាញរបស់ខ្លួននៅក្នុងបច្ចេកវិទ្យាភ្នាស (membrane technology) ដោយសារក្រុមហ៊ុនបានបង្កើតលទ្ធផលជោគជ័យជាសកលជាមួយនឹងភ្នាក់ងារចែកចាយដែលកំពុងប្រតិបត្តិការនៅក្នុងប្រទេសជាច្រើន។

ឧបករណ៍ចម្រោះទឹកម៉ាក ‘Litree’ ដ៏ល្បីល្បាញរបស់ក្រុមហ៊ុនត្រូវបានទទួលស្គាល់យ៉ាងទូលំទូលាយចំពោះប្រសិទ្ធភាពរបស់ខ្លួនក្នុងការផ្គត់ផ្គង់ទឹកក្នុងទីប្រជុំជន ការប្រើប្រាស់ទឹកឡើងវិញក្នុងឧស្សាហកម្ម និងការបន្សុទ្ធទឹកស្អាតលក្ខណៈគ្រួសារ ដែលផ្តល់អត្ថប្រយោជន៍ដល់មនុស្ស ជាង ៣ លានគ្រួសារ នៅទូទាំងពិភពលោក។

នៅក្នុងប្រទេសកម្ពុជា ផលិតផលភ្នាស UF របស់ Litree បច្ចុប្បន្នត្រូវបានចែកចាយនៅទូទាំងខេត្ត និងក្រុងនានា ដោយរួមចំណែកដល់មាត្រដ្ឋានបន្សុទ្ធទឹកស្អាតក្នុងបរិមាណ ១១.០០០ម៉ែត្រគូប/ថ្ងៃ។

ក្នុងរយៈពេល ៣ ទៅ ៥ ឆ្នាំខាងមុខ ក្រុមហ៊ុនគ្រោងនឹងវិនិយោគក្នុងទំហំទឹកប្រាក់ចំនួន ៥០ ទៅ១០០លានដុល្លារទៅក្នុងឧស្សាហកម្មផ្គត់ផ្គង់ទឹកនៅកម្ពុជា ។

ឯកឧត្តមរដ្ឋមន្ត្រី ហែម វណ្ណឌី បានស្វាគមន៍ចំពោះគំនិតផ្តួចផ្តើមរបស់ក្រុមហ៊ុនក្នុងការពង្រីកការវិនិយោគរបស់ខ្លួនក្នុងការផ្គត់ផ្គង់ទឹកស្អាតក្នុងប្រទេសកម្ពុជា ជាពិសេសនៅក្នុងតំបន់ដែលខ្វះលទ្ធភាពទទួលបានសេវាទឹកសាធារណៈ ឬឯកជន។

ដោយសង្កត់ធ្ងន់លើការយកចិត្តទុកដាក់របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការលើកកម្ពស់ការចាប់យកបច្ចេកវិទ្យានៅទូទាំងវិស័យសាធារណៈ និងឯកជន ឯកឧត្តមរដ្ឋមន្ត្រី ហែម វណ្ណឌី បានលើកទឹកចិត្តឱ្យក្រុមហ៊ុន Litree ស្វែងរកឱកាសសម្រាប់ការផ្គត់ផ្គង់ទឹកក្នុងទ្រង់ទ្រាយធំដល់ប្រតិបត្តិករទឹកឯកជន ដោយប្រើប្រាស់នូវជំនាញបច្ចេកវិទ្យា និងបង្ហាញពីបទពិសោធន៍ជោគជ័យរបស់ខ្លួន។

សម្រាប់អត្ថបទទាំងស្រុង សូមអាននៅទីនេះ

ដោយ៖​ Ben Sokhean

កាលបរិច្ឆេទបោះពុម្ភផ្សាយ៖ ថ្ងៃទី១៣ ខែឧសភា ឆ្នាំ២០២៤​

ព័ត៌មាន៖ ខ្មែរ ថាមស៍