ភ្នំពេញៈ មន្ត្រីជាន់ខ្ពស់រដ្ឋាភិបាលឱ្យដឹងថា ឥទ្ធិពលបច្ចេកវិទ្យាហរិញ្ញវត្ថុ (FinTech) នៅកម្ពុជាកំពុងផ្លាស់ប្តូរឧស្សាហកម្មហិរញ្ញវត្ថុទាំងមូលក្នុងការផ្តល់ និងទទួលបានសេវាហិរញ្ញវត្ថុ ពិសេសក្នុងអំឡុងពេលការរីករាលដាលជំងឺកូវីដ ១៩ ការប្រើប្រាស់ FinTech បានរួមចំណែកដល់ការបន្តសកម្មភាពសេដ្ឋកិច្ចសំខាន់ៗ រួមទាំងធុរកិច្ច និងការវិនិយោគ។
លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានឱ្យដឹងនៅក្នុងវេទិកាបច្ចេកវិទ្យាហិរញ្ញវត្ថុនៃពិព័រណ៍បច្ចេកវិទ្យាកម្ពុជា ២០២២ នៅរាជធានីភ្នំពេញ នៅថ្ងៃទី ១១ ខែវិច្ឆិកាថា ក្នុងអំឡុងការរីករាលដាលកូវីដ ១៩ បច្ចេកវិទ្យាឌីជីថល ជាពិសេសបច្ចេកវិទ្យាហិរញ្ញវត្ថុ (FinTech) ត្រូវបានគេសង្កេតឃើញថាជាកត្តាជំរុញប្រកបដោយសក្តានុពលខ្ពស់ក្នុងការលើកកម្ពស់កំណើនសេដ្ឋកិច្ចក្នុងតំបន់ និងសកលលោកតាមរយៈតួនាទីសំខាន់ៗចំនួន ៤ រួមមាន ការបង្កើនការប្រកួតប្រជែងដោយស្មើភាព និងប្រសិទ្ធភាពនៃការផ្តល់សេវាហិរញ្ញវត្ថុ, ការបង្កើតផ្នែកទីផ្សារថ្មី និងការពង្រឹងទីផ្សារដែលមានស្រាប់ឡើងវិញ, ការលើកកម្ពស់បរិយាប័ន្នហិរញ្ញវត្ថុតាមរយៈកម្មវិធីឌីជីថល ដែលងាយស្រួលប្រើប្រាស់ផ្សេងៗ, និងការពង្រឹងឡើងវិញ និងពង្រីកប្រព័ន្ធអេកូឡូស៊ីនៃសហគ្រាសមីក្រូ ធុនតូច និងមធ្យម (MSMEs) និងធុរកិច្ចបង្កើតថ្មី។
លោកថ្លែងថា៖ «នៅក្នុងអំឡុងពេលការរីករាលដាលកូវីដ ១៩ ការប្រើប្រាស់ប្រព័ន្ធទូទាត់អេឡិចត្រូនិកបានបន្តកើនឡើង។ ដោយសង្កេតមើលឃើញពីសក្តានុពលវិស័យ FinTech រាជរដ្ឋាភិបាលកម្ពុជាបច្ចុប្បន្នកំពុងរៀបចំសេចក្តីព្រាងគោលនយោបាយអភិវឌ្ឍន៍ FinTech របស់កម្ពុជា ដើម្បីបង្កើតក្របខ័ណ្ឌរួមសម្រាប់វិស័យ FinTech និងដើម្បីចូលរួមចំណែកដោះស្រាយបញ្ហាខ្វះខាតផ្សេងៗនៅក្នុងការពន្លឿនការអភិវឌ្ឍ FinTech ដោយមានគណៈកម្មាធិការសេដ្ឋកិច្ច និងធុរកិច្ចឌីជីថល ជាស្ថាប័នទទួលខុសត្រូវសម្របសម្រួលព្រាងគោលនយោបាយនេះ»។
ប្រធានសមាគមមីក្រូហិរញ្ញវត្ថុកម្ពុជា លោក សុខ វឿន ឱ្យដឹងថា ឧស្សាហកម្មហិរញ្ញវត្ថុនៅកម្ពុជាត្រូវបានលើកកម្ពស់ និងឆ្លងកាត់ការផ្លាស់ប្តូរឌីជីថលយ៉ាងសំខាន់ក្នុងរយៈពេល ១ ទសវត្សរ៍ចុងក្រោយមកនេះ។ លោកបន្ថែមថា ធនាគារជាតិនៃកម្ពុជាបានអនុវត្តវេទិកាអន្តរប្រតិបត្តិការជាតិសំខាន់ៗមួយចំនួនដូចជា កម្ពុជាសែស្វិច (CSS) ដែលភ្ជាប់អន្តរម៉ាស៊ីនអេធីអឹមរួមគ្នា ប្រព័ន្ធ FAST ប្រព័ន្ធទូទាត់លក់រាយ (RFT) និងកម្មវិធី KHQR ដែលដំណើរការលើបច្ចេកវិទ្យា Blockchain។
លោកលើកឡើងថា៖ «ការរីករាលដាលកូវីដ ១៩ បានដើរតួនាទីយ៉ាងសំខាន់នៅក្នុងការពន្លឿននិន្នាការនេះ ខណៈឧស្សាហកម្មជាច្រើនបានផ្លាស់ប្តូរទៅរកប្រតិបត្តិការដោយគ្មានសាច់ប្រាក់។ ដូចយើងឃើញនាពេលនេះ គឺការទទួលយកបច្ចេកវិទ្យា Fintech ដូចជាកម្មវិធីដឹកជញ្ជូនអាហារ និងទំនិញ ក៏ដូចជាការទទួលយកជាទូទៅ ការទូទាត់តាមអេឡិចត្រូនិក និងការទូទាត់តាមឌីជីថលក្នុងប្រទេសបានចាប់ផ្តើមដំណើរការជាបន្តបន្ទាប់ក្នុងគោលបំណងធ្វើឱ្យប្រសើរឡើងនូវសេវាកម្មរបស់ពួកគេ ក៏ដូចជាគុណភាពជីវិតរបស់ប្រជាជនកម្ពុជា»។
លោក Raymond Sia ប្រធានសមាគមធនាគារនៅកម្ពុជា (ABC) បាននិយាយថា នៅកម្ពុជាឌីជីថលភាវូបនីយកម្មកំពុងប្រព្រឹត្តទៅក្នុងកម្រិតមួយខ្ពស់បំផុតមិនធ្លាប់មាន។
លោកថ្លែងថា៖ «ក្នុងវិស័យហិរញ្ញវត្ថុ យើងមើលឃើញការកើនឡើងជាង ១០ ដង នៃប្រតិបត្តិការឌីជីថល ក្នុងរយៈពេល ២ ឆ្នាំចុងក្រោយនេះ តាមរយៈប្រព័ន្ធទូទាត់ និងក្រុមហ៊ុនផ្តល់ការទូទាត់»។
លោកបានបន្តថា៖ «ក្នុងវិស័យហិរញ្ញវត្ថុ ឌីជីថលភាវូបនីយកម្ម នវានុវត្តន៍ និងបច្ចេកវិទ្យា គឺផ្តោតទៅលើអតិថិជន។ ឧស្សាហកម្មរបស់យើង ជាឧស្សាហកម្មផ្តោតលើប្រជាជន។ សេវាហិរញ្ញវត្ថុ គឺជាតម្រូវការចម្បង ហើយយើងធានាថា សេវាទាំងអស់នឹងទៅដល់ប្រជាជនកម្ពុជាដើម្បីភាពជោគជ័យ និងនិរន្តរភាពនៃវិស័យនេះ និងសេដ្ឋកិច្ច»។
យោងតាមធនាគារជាតិនៃកម្ពុជា នៅក្នុងឆ្នាំ ២០២១ មានប្រតិបត្តិការចំនួន ៦៩៨,៨ លានដង ស្នើនឹងតម្លៃ ១៩៩,៧៦ ពាន់លានដុល្លារ៕
សម្រាប់អត្ថបទដើម សូមចូលទៅកាន់តំណភ្ជាប់នេះ
ដោយ៖ ម៉ៃ គុណមករា
ព័ត៌មាន៖ ភ្នំពេញ ប៉ុស្តិ៍
កាលបរិច្ឆេទបោះពុម្ភផ្សាយ៖ ថ្ងៃទី១៤ ខែវិច្ឆិកា ឆ្នាំ២០២២
