វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញដែលនឹងត្រូវរៀបចំនាពេលខាងមុខក្នុងទីក្រុងភ្នំពេញ មានគោលបំណងបង្ហាញពីសមត្ថភាពពាណិជ្ជកម្មឌីជីថលរបស់កម្ពុជា និងលើកកម្ពស់ផលិតផលដែលផលិតក្នុងស្រុកទៅកាន់ទីផ្សារសកល។ ខណៈកម្ពុជាកំពុងស្ថិតក្នុងបរិវត្តកម្មឌីជីថល ពាណិជ្ជកម្មបែបប្រពៃណីកំពុងវិវឌ្ឍដើម្បីបំពេញតម្រូវការទីផ្សារសកលដែលជំរុញដោយបច្ចេកវិទ្យា។ រដ្ឋាភិបាលកម្ពុជាបានបង្ហាញពីការប្តេជ្ញាចិត្តចំពោះការផ្លាស់ប្តូរនេះ ដោយមានគំនិតផ្តួចផ្តើមដូចជាយុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិក និងការខិតខំប្រឹងប្រែងបន្តដើម្បីព្រាងគោលនយោបាយពាណិជ្ជកម្មឌីជីថល ដោយត្រួសត្រាយផ្លូវសម្រាប់កំណើនសេដ្ឋកិច្ចប្រកបដោយចីរភាពតាមរយៈពាណិជ្ជកម្មអេឡិចត្រូនិក។
ព្រឹត្តិការណ៍រយៈពេលបួនថ្ងៃនៅបុរីប៉េងហួតបឹងស្នោរដែលមានឈ្មោះថា “វេទិកាពាណិជ្ជកម្មឌីជីថលកម្ពុជាលើកទី១ និង ពិព័រណ៍អនឡាញ (1st Cambodia Digital Trade Forum & Online Expo)” គ្រោងធ្វើឡើងនៅថ្ងៃទី១៣-១៦ ខែធ្នូ ហើយនឹងក្លាយជាឱកាសដ៏សំខាន់សម្រាប់ពាណិជ្ជកម្មឌីជីថលរបស់កម្ពុជា។ សម្ដេច ហ៊ុន ម៉ាណែត ត្រូវបានគេរំពឹងថានឹងអញ្ជើញជាអធិបតីក្នុងពិធីបើក។ កាលពីថ្ងៃទី២៥ ខែតុលា ក្រសួងពាណិជ្ជកម្មបានរៀបចំកិច្ចប្រជុំជាមួយម្ចាស់សហគ្រាសធុនតូច និងមធ្យម (SME) ដើម្បីពិភាក្សាអំពីអត្ថប្រយោជន៍នៃការចូលរួមក្នុងព្រឹត្តិការណ៍នាពេលខាងមុខ។
លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម បានសង្កត់ធ្ងន់ថា ព្រឹត្តិការណ៍ដែលមានឈ្មោះថា «ពីផលិតនៅកម្ពុជាទៅជាពាណិជ្ជកម្មសកល» នឹងបង្ហាញពីតួនាទីដែលកំពុងរីកចម្រើនរបស់កម្ពុជាក្នុងសេដ្ឋកិច្ចឌីជីថល និងគាំទ្រដល់ការពង្រីកវិស័យពាណិជ្ជកម្មឌីជីថលរបស់ប្រទេស។ យុទ្ធនាការនេះមានគោលបំណងលើកកម្ពស់ផលិតផលខ្មែរនៅលើឆាកអន្តរជាតិ ដោយប្រើប្រាស់វេទិកាពាណិជ្ជកម្មអេឡិចត្រូនិកដូចជា CambodiaTrade.com និងទីផ្សារអនឡាញផ្សេងទៀត ដើម្បីផ្សព្វផ្សាយទំនិញក្នុងស្រុកជាលក្ខណៈអន្តរជាតិ។ ព្រឹត្តការណ៍នេះក៏នឹងមានការតាំងពិព័រណ៍តាមប្រព័ន្ធអនឡាញ ដែលនឹងបម្រើទាំងការប្រារព្ធពិធីអបអរបេតិកភណ្ឌវប្បធម៌របស់ប្រទេសកម្ពុជា និងជាវេទិកាសម្រាប់ពាណិជ្ជកម្មឌីជីថល។
សម្រាប់ព័ត៌មានទាំងស្រុង សូមអាននៅទីនេះ
ដោយៈ Ben Sokhean
កាលបរិច្ឆេទបោះពុម្ភផ្សាយៈ ថ្ងៃទី៤ ខែវិច្ឆិកា ឆ្នាំ២០២៤
ព័ត៌មានៈ ខ្មែរ ថាមស៍
